132

Carmina

Nam quid nunc memorare juvat patruosque patremque?Et patris proavum, cum genitricis avo?

Utque illis eadem virtus et cura juvandiConsilio populos servitioque duces?

Quaeque patris pietas? et quae reverentia divum?

Qui fuerit purae relligionis amor?

Quot fuerint dotes? quot doctae Palladis artes?

Consilii nunquam pondere cassa fides?

Wirtembergiacaeque ut consiliarius aulaePrudenti mentem rexerit ore ducis?

Nam si cuncta velim brevibus pertexere filis:

Tractarem telas, Penelopea, tuas.

Et prius aetherium Phoebe circumvaga cursumCompleat, auratas depositura comas,

Quam mihi contingat, veterum memorare parentumNominaque et titulos et meritum omne decus.

At te, gliscenti jam dum virtute nitentem,

Exaequo proavis anteferoque tuis.

Non etenim virtus, quae delitet, occidit: olimMateriam laudis quaerere facta solet,

Quin habet ante sibi. Licet exercere latentisMunera judicii, prima juventa, tui.

Ergo age, majorum nitidos, Huldrice, tuorum,

Sponse, super titulos incipe ferre caput

Iliorumque decus studiis praecede peractis,

Notitia in sacro quam tibi jure paras;

Quam tibi nam referunt spatiosa volumina legem,

Quae non sit pridem corde reposta tuo?

Te duce quae surgunt studia in contraria jura,Unanimi coeunt conciliata via.

Tu nimium faciles ad noxia crimina legesExacuis, vultuque asperiore facis.

Idem ubi non meritos Jove nata objurgat, eodemEt scelus et culpam vindice jure petens:

Succurris miseris et magnas corrigis iras,

Si jubeas, posito jura rigore silent.

Nec tua te pietas aurum praetexere noxae,

Nec sinit insontes poena onerare viros.

Mome, procul prohibe salsae dicteria linguae,

Qui pariter meritos immeritosque notas.

Non illi mentem incantant odiumque favorque,

Non hic vim juris aurea vincla domant:

Non illum haec docuit defuncti cura parentis,

Non vidui custos mater amata tori,

Quae matres tantum reliquas supereminet una,Quantum inter sacras regia Juno deas,

Et quantum reliquos superat domus illa penates,

Quos custos Tubia cernit ab arce vigil.

Qui videt hanc, oculis praesens opera omnia lustrans,Juraret sacro numen inesse loco.