Solemnia.

Cana fides, pudor et pietas, morumque venustasHancce suo sedem constituere choro.

Utque isto templo fraudum procul exulat agmen,

Sic nihil indigenae pectora fraudis habent.Candida, justa, patens, et mens ferrugine pura,Libertasque illi plena pudoris inest.

Pectoraque aetherii satagunt non nescia cultus,

Et verba aeterni sunt in honore Dei.

Ipsaque possesso virtus opulentior auroSigna sui in facie splendidiore locat.

Quem non ille movet plenus gravitate serenaVultus et os hilari tetricitate nitens?

Scilicet ingenitae perstat gravitatis in illoPulcher honos, animi picta tabella sui.Praecipue quando aut Germano personat ore,Doctave Romano labra lepore fluunt,

Qualis io vocum, qualis nitor oris amoeni?

Quam non mentito verba colore micant?

Quis non attonito similis tua suspicit ora?

Quisve voluptatis concipit inde nihil?

Dulcia seu cupiam cursumque rotantia verba,

Inclyta Nestorei gratia mellis hebet.

Pondera seu rerum volucres librantia voces,

Hic etiam magni sunt Ciceronis opes.

Seu pietas curae est: nihil hic nisi honesta loquetur;

Non hic spurcities invenit ulla locum.

Seu placet amotis frontem diducere rugis,

Grataque festivis spargere verba jocis,

Proferet ore jocos, et erit quoque pondus in illis:

Nam pote mordaci condere verba sale est.

Sic ubi fert tempus, vultum induit ille Catonis,Democriti mores, si jubet illud, amat.Temporibus servire decet: nam tempora palmamServanti instabiles saepe dedere vices.

At quam nulla viri fastosa superbia pectus

Occupat? Heroas quam tenet illa frequens?Limina nullus adit, quem non moderata petentemExcipit et subito qua juvat arte potest.

Quis mihi nunc vates arentis flumina linguaeImpleat, ut rebus carmina digna fluant?

Ah satis est verbo se illi subducere moli:

Teutonio nullus fortior orbe vir est.

Ebrietas humens, victricibus alta quadrigis,

Germani vires conterit una soli.

Omnes servitio premat et secura triumphet:

Dedecus hoc uno milite victa capit.

Quam male firma Venus, victo quam frigida Baccho,Exemplo poteris, sponse, docere tuo.Quotusquisque tuos juvenum numeraverat annos,

Cum cupida in thalamum ducta puella sibi est?